جواب من بابا يسوع(2)

جواب من بابا يسوع(2)

أحبابى ونور عيونى ,,
أطفال يسوع الناصرى
محبتى ليكم بزيادة شوية ..

علشان كدة

صليت من أجلكم لبابا يسوع ..قلت له ..يارب إبعت جواباتك الحلوة لكل أطفال المنتدى الجميل

باركهم فيها

وإكتب لهم أخبار حلوة
تفرحهم
وتطمنهم وتسعدهم

وكان الجواب التانى

وعلى المظروف
الوديع المتواضع القلب
فأنا على طول عرفت إن صاحب الجواب بابا يسوع ..
فتحته وقريته وكتبت لكم باللى فيه يا حبايبى ..

والكلام لبابا يسوع ليكم يا حبايب يسوع الناصرى ..
كلكم غاليين على يا حبايبى ..
وبأحبكم كلكم ..
وعايز أعلمكم النهاردة شيئ جميل جدا ممكن تكونوا كلكم سالكين فيه ..
التواضع والوداعة ..

وأنا عملت لكم مثال جميل ممكن يكون سبب تتعلموا منه الفضيلة دى وتمارسوها مع إخواتكم وأصحابكم .أنا يسوع لبست المنشفة على وسطى وأحضرت إناء به مياه نظيفة

وبدأت فى غسل أرجل تلاميذى !!
ودى كانت أحقر خدمة بيقوم بيها العبد فى البيت ..
وتلميذى بطرس إستغرب ومرضيش أعمل كدة ..
لكنى فهمته إن علشان يبقى له نصيب معايا لازم ينال البركة دى ..
حبايبى ..

أنا علمت تلاميذى معنى جميل للتواضع ودة المطلوب تتعلموه من جوابى لكم النهاردة ..
ولأنى وديع ومتواضع القلب عايزكم كلكم تكونوا كدة
وإن كنتم عاوزين تكونوا فعلا تلاميذى
تقدروا تعملوا ما عملته
لما تخدموا إخوتكم بالمحبة ..
متقولوش دة شغل الخادم بس !!

أنا قمت بشغل الخادم علشان تتعلموا منى ..
لما تحنوا على بعضكم وتغفروا الإساءات لبعضكم البعض تبقوا تلاميذى ..
لما تعطوا بعضكم بعضا ما يحتاجه المحتاجين تبقوا تلاميذى ..

لما تسامحوا وتتواضعوا وتتنازلوا عن الكبرياء وحب الذات تبقوا تلاميذى ..
ومتنسوش أنا عملت دة وأنا ملك الملوك ورب الأرباب !

وإنتم تلاميذى وحبايبى وأولادى وأصحابى وحاتفضلوا كدة على طول مادمتم بتستلموا جواباتى وتقروها وتعملوا بكل اللى بأوصيكم عليه ..
ومتنسوش الكلام دة كله موجود فى الجواب الكبير اللى بعته لكل العالم
( الإنجيل ) !
فى يوحنا 13
بابا يسوع

حبايبى ..
التواضع صفة جميلة جدا
والوداعة إسم جميل ليسوع
وديع
ومتواضع القلب
وحلو جدا لما تكون الصفة دى فينا إحنا تلاميذه وحبايبه ..

صلوا معايا
يارب
بأشكرك علشان إنت الملك العظيم
رضيت بخدمتنا علشان تعلمنا الوداعة والتواضع
ساعدنى أكون تلميذ فى مدرستك
وأتعلم من جواباتك اللى فى الإنجيل
كل حاجة حلوة تعيش معايا وأكبر بيها وفيها
آمين
دمتم بخير يا حبايب
وإلى اللقاء مع الجواب التالت
متنسوش تكتبولى برأيكم ..
دمتم بكل خير
بابا يسوع