جواب من بابا يسوع(1)

أحبابى ونور عيونى ,,
أطفال يسوع الناصرى
محبتى ليكم بزيادة شوية ..

علشان كدة
صليت من أجلكم لبابا يسوع ..
قلت له ..
يارب إبعت جواباتك الحلوة لكل أطفال المنتدى الجميل

باركهم فيها
وإكتب لهم أخبار حلوة تفرحهم
وتطمنهم وتسعدهم

رد على يسوع الحلو
وبأول جواب يوصلنى .. كتبت لكم عنه

يارب يفرحكم بيه يا غاليين
إكتبولى لو قدرتم
أو بابا وماما يطمنونى عنكم

الجواب :
وصلنى ومكتوب على غلافه
أنا نور العالم ..
والراسل : بابا يسوع

أقراه لكم وإنتم كمان إقروه وخلوا بابا وماما يفهموكم معناه ..
أطفالى الحلوين .
أنا بابا يسوع
الوحيد اللى يقدر يقول عن نفسه
( أنا نور العالم )
ومين فيكم ميحبش النور ؟؟
مين مبيخافش من الضلمة ؟؟

النهاردة وفى أول جواب لبابا يسوع
حايعرفكم إزاى تعيشوا فى النور ومتخافوش أبدا من الضلمة
لأنها مش حاتكون أبدا موجودة فى حياتكم ..

لما تقرأوا كلامى الحلو عنكم فى الكتاب المقدس
وإزاى أنا حبيتكم ودعيتكم لى ووصيت بابا وماما يعلموكم كل حاجة حلوة عنى ..
وكتبت لبابا وماما الآية الحلوة دى
بأوصيهم عليكم ..
دعوا الأولاد يأتون إلى ولا تمنعوهم لأن لمثل هؤلاء ملكوت السموات ..

حبايبى
اللى يتكلم بالصدق بيعيش فى النور ..
واللى يحفظ وصيتى يعيش فى النور
واللى يصدق كلامى ويبعد عن كل خطية تزعلنى
يعيش فى النور !!

على فكرة يا غاليين
اللصوص بس اللى يحبوا يعيشوا فى الضلمة علشان بيعملوا كل الحاجات الوحشة اللى الضلمة بتخبيها
لكن أنا يسوع شايفهم
وحأعاقبهم عليها ..

إن كنتم عايزين تعيشوا فى النور
صدقوا كلامى يا غاليين
وإحفظوه
وحاتعيشوا دايما فى النور
ومفيش أبدا ضلمة تخوفكم
بابا يسوع

حبايبى
صلوا معايا لبابا يسوع
بابا يسوع
إنت خالق النور
علمنا نعيش فى النور ونبعد عن كل شيئ مظلم
ونكون مخلصين ومنورين بكل أعمالنا وأقوالنا
ولا نخبئ أى شيئ عنك أو عن بابا وماما
علشان نبتعد عن كل ظلمة ونكون دايما أولاد نور

حبايبى
نتقابل فى الجواب الجاى مع بابا يسوع إنشاء الله
دمتم بكل صحة يا غاليين
آمين